9. මම පොරක්!!!!! මම ලොකු පොරක්!!!!! මම සංවේදී පොරක්!!!!!

සිංහල බ්ලොග් අවකාසයේ එක එකා එක එක ආතල් දෙන හැටි ලකෆ්‍රෑන්ස් බලාගෙන හිටියේය. ආතල් කෝටියකට පොඩ්ඩක් අඩුවෙන් තිබ්බේය. ජොනී වෝකර් කියලා බුවෙක් ඒ ආතල් ගැන හරි ලස්සනට ලියලා තිබ්බේය. කම්මැලිකමට කියවන්න වටින පෝස්ට් කීපයක් ඒකේ තියෙන්නේය. වෙන වැඩ නැති උන්දෙලාට ඒ පැත්තේ ගිහින් එන්නද පුලුවන්ය. ඒ අතරවාරයේ ගොඩ දෙනෙක් ලකෆ්‍රෑන්ස් සමග ඊ මේල් ගනුදෙනු කලේය.සමහරක් සිතුවේ ලකෆ්‍රෑන්ස් සිංහල බ්ලොග් අවකාසෙන් ඌර්දවපාතනේ උනා කියලාය. සමහරක් තැන් තැන්වල එහෙම කියලාද තිබ්බේය. මේ උත්තරේ දෙන්නේ එහෙම තැන් තැන්වල කියෙව්ව බුවාලා වෙනුවෙන්මය.

රංගොජා මල්ලියාට ලියමනක් යැව්වාට පස්සේ ලකෆ්‍රෑන්ස්ගේ අදහස තිබ්බේ සයිබර් ෆෙස්ටිවල් එක ගැන ලියන්නය. වෙන වෙන වැඩ නිසා ඒ ලිවිල්ල පරක්කු උනාය. දැන් ඒවා ලියලා වැඩක් නැතිය. එයිට වඩා ආතල් සිදුවීම් සිංහල බ්ලොග් අවකාසේ සිදුවෙනවාය.

ලකෆ්‍රෑන්ස් කවදත් පාඨකයන්ට අත දෙන්නෙක්ය. පාඨකයන්ට තමන් දකින දේවල් ලියලා එවන්න ලකෆ්‍රෑන්ස් දෙන්නේ පොඩි උපකාරයක් නෙමේය. මේකත් එහෙම පාඨකයෙක් එව්ව ලිපියක්ය. ලකෆ්‍රෑන්ස් මේ ලිපිය පොඩ්ඩක්වත් වෙනස් කළේ නැතිය. මේල් එකේ එව්ව එක කොපි කරලා පේස්ට් කරා ඇර ලකෆ්‍රෑන්ස් මොකවත් කලේ නැතිය. මේක එව්ව පාඨකයාට ලකෆ්‍රෑන්ස්ගේ ස්තූතිය. 

මම පොරක්!!!!! මම ලොකු පොරක්!!!!! මම සංවේදී පොරක්!!!!!

මට මතකයි මං බ්ලොග් ලෝකෙට ආව හැටි.. ඒ අදට හරියටම අවුරුද්දකට කලින්.. මං හෙන සල්ලි කාර මිනිහෙක්.. බ්ලොග් ලියන්න කලින් මට සමාජයේ වැදගත් තැනක් තිබ්බා.මං ආවෙ පොරක් වෙන්න.. මට ඕනි ම කොච්චර පොරක්ද කියලා ඔයාලට කියන්න. නැත්තං ඔයාලා මං ගැන වැරදියට හිතාගෙන ඉදී.

මං ඉපදුනේ ලොකු ඉස්පිරිතාලෙක.. අපෙ තාත්තා කිව්වේ ඒ ඉස්පිරිතාලෙ ඉපදිලා තියෙන්නෙ මං විතරයි කියලා. ඒ නිසා මං පොඩි කාලෙ ඉදංම හිතාගෙන හිටියේ මං හෙන ලොකු පොරක් කියලා. ඒ නිසා මං කාත් එක්කවත් වැඩිය කතා කරෙ නෑ. ඒ ලැජ්ජාවටවත් නෝන්ජල් කමකටවත් නෙමේ. මං පොරක් නිසා. මට මතකයි මං ශිෂ්‍යත්ව විභාගෙ හොදට පාස් උනා. ලංකාවෙ පලවෙනියා නෙමේ. ඒත් අපෙ තාත්තා කිව්වේ මං විතරයි එහෙම පාස් වෙලා තියෙන්නෙ කියලා. ඔයාලට තේරෙනවා නේද මං කොච්චර ලොකු පොරක්ද කියලා..

ඔහොම කාලෙ ගෙවිලා ගිහින් මං සා පෙල කරා.. එදා අපෙ මුලු ඉස්කොලෙන්ම පාස් වෙලා හිටියෙ මං විතරයි. ඊට පස්සෙ උ පෙල පාස් වෙලා කැම්පස් ගියා. අන්න එදා තමා මං මං ගැන ගොඩාක් ආඩම්බර උනේ. මං තමා ලංකාවෙන්ම කැම්පස් ගිහින් තියෙන්නේ. එදා මට මතකයි අපෙ නෑදෑයො මාව බලන්න අපෙ ගෙදරට ආවා. කැම්පස් යන පලවෙනි ළමයා කියලා මගේ මූණ අතගාලා යන්නම නෑදෑයෝ පෝලිමේ බලං හිටියා. ඒ දවස මට අද වගේ මතකයි.. ඒ 2004 අප්‍රේල් පලවෙනිදා..

මං කැම්පස් ගිහිල්ලා ගොඩාක් පොරක් උනා. මට මුලු සමාජයෙන්ම මාර තැනක් ලැබිලා තිබ්බේ. ඒ කාලෙ මට තාත්තා ඩොක්ට සනී කාර් එකක් අරං දීලා තිබ්බා. ඒ තාත්තා හිතුවා මං ඩොක්ට කෙනෙක් වෙයි කියලා. ඒ කාලෙ ලංකාවට ඒ කාර් එක ඇවිල්ලත් නෑ. මට තාම මතකයි මගේ කැම්පස් එකේ වැඩ කරපු අය පාර අයිනට වෙලා බලං ඉන්නවා මං කාර් එකේ ඇවිත් බහිනකං.. මං කාර් එක නවත්තලා ගියාම එයාලා හොරෙන් වගේ ඇවිත් කාර් එක අතගාලා යනවා. මං ඉතින් උඩ තට්ටුවට වෙලා ඒක බලාගෙන ඉන්නවා. මොකද මං හෙන පොරක්නේ.

ඔහොම ඉදලා මට ෆස්ට් ක්ලාස් එකක් එක්ක මං උපාධිය ගත්තා. ඔයාලට සැකයි නන් මං පෙන්නංනන්.. ඒකට තාත්තා මට තමා ලංකාවෙන්ම පලවෙනි හයිබ්‍රිඩ් වාහනේ අරං දුන්නේ. මං දොස්තර යාලුවා කියන්නේ මං හෙන වාසනාවන්තයිලු.. හැබැයි ඒකට ඉංජිනේරුයාලුවා කිව්වා වාසනාවන නෙමේ ලැබීම කියලා. මට කවදාවත් වෙන රස්සාවල් කරපු යාලුවො හිටියෙ නෑ. මොකද මං වගේ කෙනෙක්ට නිකං රස්සාවල් කරන යාලුවො ගැලපෙන්නැති නිසා. මං බෑ කියද්දි මාව තෝර ගත්තා අලුත් ළමයින්ට උගන්නංන. ඒකට මාව විතරමයි තොරගෙන තිබ්බේ..

ඔන්න ඊට පස්සෙ තමා මං බ්ලොග් ලියන්න ආවේ. මං හිතුවෙ බ්ලොග් ලියන්නේ මං වගේම කැම්පස් ගිහින් ෆස්ට් ක්ලාස් උපාධියක් ගත්ත අය විතරයි කියලා. අපි වගේ සල්ලි තියන අයට ඉන්ටනෙට් කම්පියුටර් තිබ්බට අනිත් හිගන්නන්ට කොහෙද ඔව්වා කියලා අපෙ තාත්තා මට නිතර කියලා තියනවා. මං තාත්තව ගොඩක් විශ්වාස කරා. කරලා මං බ්ලොග් ලිව්වා. මං ආස උනා කවුරුවත් මට සලකන්නැති නිස බ්ලොග් ලියන උගත් අයවත් මට සලකයි කියලා..

මගේ ඒ ආසාව විනාශ කරා.. මං දවසක් කැම්පස් එකේ ඉදලා බ්‍රෙඩ් ටෝක් එකට ආවා ස්නැක් එකක් ගන්න.. එතකොට මාව දැකපු කොහෙද මන්දා ඉන්න කොල්ලෙක් ඇවිත් ආහ් අයියා. කොහොමද ඇහැව්වා.. මට අප්පිරියා හිතුනා. ඔයාලට තේරෙනවා නේද මාව කොච්චර අපහසුතාවයකට පත් උනාද කියලා. මං ආස නෑ මට එහෙම කතා කරනවට. මගේ සමාජයේ මට තියන තැන මොකක්ද.. ඉගන ගත්තෙ නැති මෝඩ යක්කු.. ඔකුන්ට හොදක් වෙන්න හොද නෑ මට එහෙම කතා කරාට.. මං අදින් පස්සෙ බ්ලොග් ලියන්නෙ උපාධි තියන උන්ට විතරයි.. මං කවදහරි ලොකු වෙලා රටේ ජනාධිපති උනාම උපාධි සහතිකේ නැත්තං ඉන්ටනෙට් පාවිච්චි කරන එක තහනම් කරනවා.. සත්තයි.. ප්‍රොමිස්.....

මම පොරක්!!!!!

මම හරිම ලොකු පොරක්!!!!!

මම ලොකුම ලොකුම ලොකුම ලොකු පොරක්!!!!!

හැබැයි මම සංවේදී පොරක්!!!!!